Kolbeinn Sigþórsson jafnaði markamet Eiðs Smára Guðjohnsen með íslenska landsliðinu í síðasta landsleikjaglugga. Hann stefnir á að slá metið á fimmtudaginn gegn Tyrkjum í Istanbúl.

Þá segist Kolbeinn hafa fengið hamingjuóskir frá Eiði eftir að hafa jafnað metið.

„Það er stefnan! Ég fer í hvern einasta leik með það markmið að skora. Eiður sendi mér línu eftir að ég jafnaði metið og óskaði mér til hamingju," sagði Kolbeinn í viðtali við Fótbolta.net í dag.

Kolbeinn er búinn að skora 26 mörk í 54 landsleikjum.

Ísland mætir Tyrklandi í Istanbúl á fimmtudaginn og Moldóvu í Kisínev 17. nóvember. Ísland þarf að vinna báða leiki og treysta á að Tyrkir misstígi sig gegn Andorra í lokaumferðinni til að komast á EM í gegnum riðlakeppnina.

„Líkurnar eru ekki með okkur en við þurfum að taka þessa tvo leiki sem eftir eru til að auka möguleikana. Við ætlum okkur að vinna þá," segir Kolbeinn.

Leikið verður á heimavelli Galatasaray sem er háværasti leikvangur heims samkvæmt heimsmetabók Guinness.

„Þetta er geggjað umhverfi fyrir fótbolta og Tyrkir eru einir bestu stuðningsmenn í heimi. Það verða mikil læti en okkur líður vel í stemningu."

Sjá einnig:
Kolbeinn besti leikmaður Íslands í undankeppninni

Tweet

Senda a Facebook Hafdu samband Senda frétt Prenta frétt Frétta leit