Andoni Iraola þjálfari Bournemouth var spurður út í möguleg félagaskipti Bournemouth í janúarglugganum og staðfesti að félagið væri í leit að nýjum framherja.
Bournemouth sárvantar nýjan framherja eftir að Evanilson, sem félagið keypti frá Porto fyrir um 40 milljónir síðasta sumar, braut bein í fæti í sigri gegn Everton í byrjun mánaðar.
Enes Ünal er einnig fjarverandi vegna slæmra meiðsla og leiddi kantmaðurinn Dango Ouattara sóknarlínu Bournemouth í enska bikarnum um helgina.
„Ég hef ekki hugmynd um hvað mun gerast á leikmannamarkaðinum, það er ekki mitt hlutverk. Ég veit að við ætlum að kaupa framherja, það er okkar helsta markmið. Allir á skrifstofunum eru að vinna í því," segir Iraola.
„Við misstum bæði Enes og Evanilson í meiðsli í vikunni og þurfum að fylla í skarðið. Það mun taka sinn tíma vegna þess að það er ekki auðvelt að finna góðan framherja í janúar. Góður framherji er mjög mikils virði í dag.
„Það er skiljanlegt að önnur félagslið vilji ekki selja framherjana sína á miðju tímabili. Við þurfum að finna framherja sem er tilbúinn til að spila í úrvalsdeildinni. Það er ekki auðvelt en allir innan félagsins eru að vinna hörðum höndum að þessu."
Athugasemdir
