Danski miðjumaðurinn Matthias Præst hefur skrifað undir þriggja ára samning við KR en hann mun formlega ganga í raðir félagsins frá Fylki eftir tímabilið.
Þessi 24 ára gamli leikmaður kom til Fylkis fyrir tímabilið en áður hafði hann spilað með Middelfart og Horsens í heimalandinu ásamt því að hafa leikið fyrir HB og AB Argir í Færeyjum.
Á þessu tímabili hefur hann gert þrjú mörk í átján leikjum með Fylki í Bestu deildinni.
Eftir tímabilið mun hann ganga til liðs við KR en félagið greindi frá þessu í dag. Samningurinn er til þriggja ára.
Glugganum er því lokið hjá KR en Óskar Hrafn Þorvaldsson, yfirmaður fótboltamála hjá KR, staðfesti það við Fótbolta.net í dag.
KR hefur fengið þá Guðmund Andra Tryggvason, Ástbjörn Þórðarson og Gyrði Hrafn Guðbrandsson í glugganum. Þá mun Hjalti Sigurðsson taka slaginn með liðinu á næsta tímabili og fjallað hefur verið um að Alexander Helgi Sigurðarson hafi einnig skrifað undir samning sem tekur gildi eftir tímabilið.
Athugasemdir
