Markvörðurinn Mike Maignan og vinstri bakvörðurinn Theo Hernández eiga aðeins tvö ár eftir af samningum sínum við félagið og þykja þeir vera algjörir lykilmenn í byrjunarliðinu.

Kantmaðurinn Rafael Leao á hins vegar fjögur ár eftir af sínum samningi við félagið, en hann er afar eftirsóttur leikmaður.

„Mike, Theo og Rafa verða áfram hjá félaginu í sumar. Þeir eru samningsbundnir Milan og þeim líður vel hérna," sagði Zlatan.

„Félagið er í góðri stöðu. Við þurfum ekki að selja neina leikmenn til að kaupa inn nýja."

Zlatan var einnig spurður út í hollenska framherjann Joshua Zirkzee sem verður líklegast seldur frá Bologna í sumar í ljósi mikils áhuga á honum. Milan hefur verið sterklega orðað við leikmanninn en stórveldi úr enska boltanum eru einnig áhugasöm.

„Mér líkar við Zirkzee, hann er góður og mjög efnilegur leikmaður."