Í kvöld flaug svo liðið með einkaflugi frá Alicante flugvelli og yfir til höfuðborgar Svartfjallalands, Podgorica. Þar mun Ísland æfa og halda fréttamannafund á morgun en leikurinn á laugardag fer hinsvegar fram í borginni Niksic, í um klukkutíma akstursfjarlægð frá höfuðborginni.

Ástæðan er sú að grasið á þjóðarleikvangnum í Podgorica stenst ekki kröfur UEFA og því verður leikið á minni leikvangi, sem tekur um fimm þúsund áhorfendur. Það sama var uppi á teningnum þegar Svartfellingar tóku á móti Wales fyrir tveimur mánuðum síðan.

Flugvél íslenska liðsins lenti hér í Podgorica um klukkan 22:20 að staðartíma eftir þægilega flugferð. Rúta flutti liðið beint á hótelið þar sem liðið hvílist fyrir átökin framundan.

Fótbolti.net fylgir landsliðinu í þessari Evrópureisu og hvetjum við lesendur til að fylgjast með bak við tjöldin á Instagram síðu okkar (fotboltinet) ásamt því að skoða fréttir og viðtöl á síðunni sjálfri.

Eins og fram hefur komið þá getur Ísland með hagstæðum úrslitum gegn Svartfellingum átt möguleika á því að leikurinn gegn Wales á þriðjudaginn verði úrslitaleikur um að komast í umspil um sæti í A-deildinni, ef velska liðið nær ekki að vinna Tyrki á sama tíma. Ísland er sem stendur í þriðja sætinu en það gefur umspilssæti um að halda sér í B-deildinni.