Manchester United hefur verið að spila frábærlega að undanförnu og unnið hvern leikinn á fætur öðrum.
Eins og staðan er núna er Man Utd sex stigum á eftir toppliði Arsenal eftir 18 umferðir. Arsenal á hins vegar leik til góða gegn Tottenham Hotspur síðar í dag.
Arsenal og Manchester United mætast um næstu helgi og þá á Arsenal eftir að mæta Manchester City tvívegis.
Erik ten Hag, stjóri Man Utd, var spurður út í titilbaráttuna eftir sigurinn öfluga gegn Man City í gær.
„Stuðningsmenn okkar mega dreyma en við verðum að halda fótum okkar á jörðinni," sagði Hollendingurinn.
„Spilamennska okkar verður að batna. Það má ekki gerast svona eftir leikhlé að við missum tökin á leiknum."
United er á fullu í fjórum keppnum. Liðið er komið í undanúrslit í deildabikarnum og áfram í næstu umferð í enska bikarnum.
Þá mætir Man Utd liði Barcelona í umspili fyrir 16 liða úrslit Evrópudeildarinnar.