Nóg af umdeildum atvikum í Vesturbæ - „Hann hefði staðið þetta af sér í miðbæ Reykjavíkur"

Mark ÍA var sérstaklega vafasamt. Árni Snær Ólafsson, markvörður Skagamanna, átti langa sendingu fram og tók Kennie Chopart við boltanum en missti hann upp í loftið.

Gísli Laxdal Unnarsson kom sér í baráttuna og virtist slá til danska leikmannsins sem féll til jarðar. Gísli hélt áfram og lagði svo boltann skemmtilega vinstra megin inn í teiginn á Steinar Þorsteinsson sem lagði hann fyrir markið á Eyþór Wöhler sem skoraði.

Það var rætt það hvort KR hefði átt að fá aukaspyrnu er Gísli virtist slá til Kennie en þá var það einnig rætt hvort Eyþór hafi verið rangstæður þegar Steinar lagði boltann fyrir markið.

„Hann hefði staðið þetta af sér í miðbæ Reykjavíkur," sagði Þorkell Máni Pétursson í Stúkunni á Stöð 2 Sport.

Helgi Mikael sleppti því einnig að dæma er Kristinn Jónsson hamraði Steinar niður í teignum. Steinar var að hlaupa úr teignum, potaði í hann áður en Kristinn þrumaði hann niður.

Stuttu síðar féll svo Atli Sigurjónsson í teignum eftir að Oliver Stefánsson fleygði sér í tæklingu. Atli missti jafnvægið og datt í grasið en Helgi Mikael sá ekkert athugavert við þetta.

Staðan er núna 2-1 fyrir KR. Atli Sigurjónsson var að taka forystuna fyrir heimamenn.

hvernig er þetta ekki víti????

— Björgvin Stefánsson (@badgalbjoggi) June 15, 2022

Sýnist Helgi Mikael ætla að eiga dag. Þó þetta hafi ekki verið mikið held ég að þetta hafi nú verið brot á Gísla í aðdraganda marksins....svo sleppir hann pjúra víti á KR, Kristinn neglir hann niður.

— Hrafn Kristjánsson 🇺🇦 (@ravenk72) June 15, 2022