Íris Dögg Gunnarsdóttir er gengin til liðs við Þrótt R. frá Breiðabliki en þetta kemur fram í tilkynningu frá knattspyrnudeild Þróttar R.
Íris Dögg er 31 árs gömul en hún var varamarkvörður Blika á síðasta tímabili og lék þar tvo leiki í Mjólkurbikarnum.
Hún á langan feril að baki en hún hóf meistaraflokksferil sinn með Fylki áður en hún gekk í raðir KR árið 2006. Húnn hefur einnig leikið með FH, Haukum, Gróttu og Aftureldingu á ferlinum.
Hún tekur við markvarðarstöðunni af Friðriku Arnardóttur sem hefur ákveðið að taka sér hlé frá fótbolta.
Íris Dögg gerir samning við Þrótt út þetta keppnistímabil en liðið hafnaði í fimmta sæti Pepsi Max-deildarinnar á síðustu leiktíð með 18 stig.
„Við fögnum því að fá Írisi í okkar raðir, hún býr yfir mikill reynslu sem á eftir að nýtast okkur vel í þeim mótum sem í hönd fara. Ekki síst mun reynsla Írisar nýtast vel í PepsiMax deildinni, enda á hún að baki yfir 80 leiki í efstu deild. Koma hennar er mikilvægur liður í undirbúningi Þróttaraliðsins fyrir átökin í efstu deild í sumar," sagði Kristján Kristjánsson, formaður knattspyrnudeildar Þróttar.
Athugasemdir