Guirassy er 28 ára gamall Frakki sem er ættaður frá Gíneu og leikur fyrir landsliðið. Hann skoraði 11 mörk í 24 leikjum fyrir yngri landslið Frakklands en fékk aldrei tækifærið með A-landsliðinu.

Guirassy er samningsbundinn Stuttgart sem stendur og þar hefur hann verið að raða inn mörkunum. Framherjinn skoraði 28 mörk í 28 deildarleikjum á síðustu leiktíð, en í heildina hefur hann gert 44 mörk í 58 leikjum fyrir félagið - auk þess að gefa 5 stoðsendingar.

Guirassy lék áður fyrir Lille, Auxerre, FC Köln, Amiens og Rennes eftir að hafa alist upp hjá Laval, en hann hefur aldrei áður náð sér á strik líkt og hjá Stuttgart.

Framherjinn er þó með 17,5 milljón evra riftunarákvæði hjá Stuttgart og þykir öruggt að það ákvæði verði virkjað í sumar enda er mikill áhugi á honum.

BILD segir að Arsenal og Chelsea leiði kappið um Guirassy, þó að félög á borð við FC Bayern, Borussia Dortmund, AC Milan og Manchester United hafi einnig mikinn áhuga.