Spænska knattspyrnusambandið vonast til þess að Ansu Fati, 16 ára gamall leikmaður Barcelona, ákveði að leika fyrir spænska landsliðið.
Fati hefur vakið mikla athygli í upphafi tímabils hjá Barcelona. Hann hefur stigið upp í fjarveru leikmanna eins og Luis Suarez, Lionel Messi og Ousmane Dembele.
Um síðustu helgi skoraði hann og lagði upp á fyrstu 10 mínútunum í 5-2 sigri gegn Valencia.
Fati er fæddur í Gínea-Bissá, en hann flutti til Spánar þegar hann var aðeins sex ára gamall. Vonast er til þess að hann leiki fyrir spænska landsliðið í framtíðinni og er knattspyrnusambandið þar í landi að vinna í þeim málum.
„Starfsfólkið hjá knattspyrnusambandinu er að vinna í þessu og það verður svo undir leikmanninum komið," sagði Roberto Moreno, landsliðsþjálfari Spánar, við Movistar.
Planið hjá Spáni er að hafa Fati inn í myndinni fyrir HM U17 sem fer fram í Brasilíu frá 26. október til 17. nóvember. Ef hann tæki þátt í því móti þá myndi hann missa af nokkrum leikjum hjá Barcelona.
Athugasemdir
