Kári í baráttu við Harry Kane í fyrri leiknum gegn Englandi.
Kári Árnason verður fyrirliði Íslands gegn Englandi í Þjóðadeildinni annað kvöld. Kári mun leiða íslenska liðið út á tóman Wembley þar sem engir áhorfendur verða á leiknum.
„Þetta er orðið vel þreytt. Ég held það séu allir sammála um það," sagði Kári á fréttamannafundi í dag spurður út í áhorfendaleysið.
„Þetta er ekki það sama. Hvort sem það er fyrir framan 1000 manns í Víkinni eða 100 þúsund manns hérna þá er þetta ekki það sama. Vonandi kemur bóluefni sem fyrst svo þetta geti meðal annars haldið áfram. Það er leiðinlegra að horfa á þetta sjónvarpinu meira að segja."
Kári spilaði með Rotherham í úrslitaleik í umspili á Wembley árið 2014.
„Það var rosa mikið undir þá, að fara upp um deild. Það var nánast fullur völlur og það var alveg geggjað," sagði Kári.
Athugasemdir
