Það var þremur leikjum að ljúka í ítölsku deildinni rétt í þessu þar sem stórveldið Juventus tapaði óvænt gegn nýliðum Monza.
Juve spilaði stærsta hluta leiksins manni færri eftir að Angel Di Maria gaf andstæðingi sínum olnbogaskot í bringuna á 40. mínútu.
Tíu leikmenn Juve sköpuðu sér lítið og tókst þeim ekki að koma í veg fyrir mark Christian Gytkjær á 74. mínútu. Hinn danski Gytkjær skoraði sigurmarkið 20 mínútum eftir innkomu sína af bekknum.
Juve reyndi að jafna en Dusan Vlahovic fékk litla sem enga þjónustu í fremstu víglínu. Hann fékk tækifæri til að skora en nýtti ekki og urðu lokatölur 1-0. Juve fer inn í landsleikjahlé með tíu stig eftir sjö umferðir. Þetta er fyrsta tap liðsins á deildartímabilinu.
Monza 1 - 0 Juventus
1-0 Christian Gytkjær ('74)
Rautt spjald: Angel Di Maria, Juventus ('40)
Lazio heimsótti þá nýliða Cremonese og rúllaði yfir þá. Leikmenn voru að svara fyrir sig eftir hrikalegt 5-1 tap gegn Midtjylland í vikunni.
Ciro Immobile skoraði tvö og gaf eina stoðsendingu og þá átti Sergej Milinkovic-Savic bæði mark og stoðsendingu.
Að lokum hafði Fiorentina betur gegn Verona þrátt fyrir vítaspyrnuklúður Cristiano Biraghi. Jonathan Ikone fékk tækifæri í byrjunarliðinu og nýtti það til að skora laglegt mark eftir flott einstaklingsframtak.
Nico Gonzalez hefur verið að glíma við erfið meiðsli á hæl og náði að spila síðustu 25 mínútur leiksins. Hann innsiglaði sigurinn undir lokin.
Cremonese 0 - 4 Lazio
0-1 Ciro Immobile ('7)
0-2 Ciro Immobile ('21, víti)
0-3 Sergej Milinkovic-Savic ('45)
0-4 Pedro ('79)
Fiorentina 2 - 0 Verona
1-0 Jonathan Ikone ('13)
2-0 Nico Gonzalez ('90)
