Rúnar Alex á landsliðsæfingu í Rússlandi.
Landsliðsmarkvörðurinn Rúnar Alex Rúnarsson samdi í gær við franska félagið Dijon en liðið endaði í ellefta sæti frönsku deildarinnar á síðasta tímabili.
Þetta er spennandi skref fyrir Rúnar Alex sem hefur verið hjá Nordsjælland í Danmörku síðustu ár. Hann spjallaði við fjölmiðla fyrir æfingu íslenska landsliðsins í Rússlandi í dag.
Þetta er spennandi skref fyrir Rúnar Alex sem hefur verið hjá Nordsjælland í Danmörku síðustu ár. Hann spjallaði við fjölmiðla fyrir æfingu íslenska landsliðsins í Rússlandi í dag.
„Það var mjög fínt að klára þetta í gær og ég er mjög feginn því að þetta sé búið," segir Rúnar Alex en Dijon lagði mikla áherslu á að fá hann.
„Það er bara geggjað og sýnir að þeir ætla að treysta á mig. Það gefur mér auka sjálfstraust."
Fannst honum vera kominn tími á næsta skref á sínum ferli?
„Ég var búinn að vera lengi undir sama þjálfarateymi og það var komin smá þreyta og ég held að þetta hafi verið fullkomin tímasetning til að skipta um félag. Ég vissi fyrst af þeirra áhuga í fyrra, eftir tímabilið þá. Þetta er stórt skref en mér finnst ég vera tilbúinn, annars hefði ég ekki tekið það."
„Þeir segja mér að ég sé kominn þarna til að vera númer eitt og ég ætla að halda hinum fyrir aftan mig."
Dijon borgaði tólf milljónir danskra króna fyrir Rúnar eða 200 milljónir íslenskra króna, samkvæmt heimildum Vísis. Hann er því dýrasti markvörður Íslandssögunnar.
Rúnar Alex segir að fleiri félög hafi verið inni í myndinni en heildarpakkinn hjá Dijon hafi verið mest spennandi.
„Ég er að fara í krefjandi verkefni og vonandi verður þetta kafli tvö í bókinni sem ég er að skrifa og ég geti farið enn hærra næst," segir markvörðurinn metnaðarfulli en viðtalið í heild sinni má sjá hér að ofan.
Athugasemdir
