Quique Sanchez Flores, stjóri Watford, hefði viljað fara heim með þrjú stig eftir leik liðsins gegn Tottenham í ensku úrvalsdeildinni í dag.
Gestirnir frá Watford komust yfir snemma leiks og héldu forystunni þar til í lokin þegar Dele Alli náði að jafna.
Alli skoraði eftir að Ben Foster missti boltann úr höndum sér. Quique Flores telur Alli hafa verið brotlegan í aðdraganda marksins og þá vildi hann einnig fá vítaspyrnu fyrr í leiknum.
„Það er gott að heimsækja þennan völl og fara heim með stig en við hefðum átt að vinna þennan leik. Það er mjög svekkjandi að ná bara í stig í dag," sagði Flores.
„Mér fannst eins og þetta hafi átt að vera vítaspyrna hjá okkur. Svo í markinu þeirra tel ég Dele Alli hafa brotið á markverðinum okkar, en það er bara mín skoðun. Hann ýtir í hann með báðum höndum."
Athugasemdir