Hollenska félagið PSV Eindhoven mun að öllum líkindum selja belgíska vængmanninn Johan Bakayoko í sumarglugganum, en erfiðlega gengur að semja um framlengingu. Þetta kemur fram í hollenska miðlinum ED.
Þessi 21 árs gamli leikmaður hefur vakið áhuga fjölda stórliða um alla Evrópu fyrir frammistöðu sína í Hollandi og í Meistaradeildinni.
Á þessu tímabili hefur hann skorað 10 mörk í öllum keppnum en aðeins gefið þrjár stoðsendingar. Hann er samt sem áður frábær í flestu sem vængmaður þarf að hafa í vopnabúri sínu og því eðlilegt að áhuginn sé mikill.
ED segir að það sé raunhæfur möguleiki á að hann skipti um félag í sumar. Bakayoko verður samningslaus á næsta ári og hefur gengið illa að finna samkomulag um framlengingu.
Þolinmæði PSV er sögð á þrotum og að félagið hafi nú tekið ákvörðun um að selja hann í sumar.
Arsenal, Borussia Dortmund, Chelsea, Liverpool, Manchester United og Paris Saint-Germain eru öll sögð áhugasöm um að fá hann í sumar.
Athugasemdir
