Fram og ÍBV gerðu 3-3 jafntefli í opnunarleik nýja Framvallarins í Úlfarsárdal. Um var að ræða tíðindamikinn leik sem sveiflaðist fram og til baka og aldrei var daufur punktur. Mikil skemmtun þar sem bæði lið voru ósátt við niðurstöðuna.
Lestu um leikinn: Fram 3 - 3 ÍBV
Guðmundur Magnússon skoraði þrennu í opnunarleiknum og stefnir á að halda markaskorun sinni áfram.
„Ég setti þau þónokkur í Safamýri og ætla að taka upp á því strax að byrja að skora hérna. Það var geggjað að spila þennan leik, stúkan nánast full og mikill spenningur. Síðustu daga hefur verið mikið húllumhæ og loksins kom að þessu. Menn voru tjúnaðir upp," segir Guðmundur.
„Mér fannst við betra fótboltaliðið í þessum leik en þeir mættu með Hemma Hreiðars brjálæðið hérna. Það virðist erfitt fyrir okkur að sigla sigrunum heim. Við þurfum að taka okkur saman sem lið og ná að líma fyrir markið."
