Tíu sem gætu tekið við KR

Ágúst Gylfason - Fyrrum leikmaður KR og er með tengingu við Vesturbæinn. Er með góða reynslu úr þjálfun en hann stýrði síðast Stjörnunni í fyrra.

Brynjar Björn Gunnarsson - Eins og Ágúst, þá er hann er fyrrum leikmaður KR og er með tenginguna. Var nýverið látinn fara frá Grindavík.

Daniel Agger - Ef KR leitar aftur út fyrir landsteinanna þá er alveg þess virði að prófa að heyra í Dananum sem lék áður með Liverpool. KR heyrði í Scott Brown, fyrrum leikmanni Celtic, áður en Gregg Ryder var ráðinn. Af hverju ekki að heyra í Agger? Er án starfs í augnablikinu en hann hefur verið að stíga sín fyrstu skref í þjálfun.

Elísabet Gunnarsdóttir - Einn færasti þjálfari Íslands er á lausu. KR gæti skrifað söguna með því að ráða hana.

Gunnar Heiðar Þorvaldsson - Það eru líklega fáir betri þjálfarar á Íslandi til þess að koma inn á miðju tímabili. Hefur gert eftirtektarverða hluti með Njarðvík og á það skilið að vera orðaður við svona störf.

Ólafur Ingi Skúlason - Er einn efnilegasti þjálfari Íslands en í dag stýrir hann U19 landsliðinu. KR ræddi við hann áður en Gregg var ráðinn en þá neitaði hann. Hvað segir Ólafur Ingi núna?

Ólafur Jóhannesson - Einn sigursælasti þjálfari í sögu íslenska boltans gæti verið tilbúinn í eitt gigg í viðbót. Ekki láta ykkur bregða ef hann tekur þá Bjössa Hreiðars með sér.

Óskar Hrafn Þorvaldsson - Draumakostur KR-inga. Er kominn í starf hjá félaginu en spurning hvort hann sé klár að taka við starfinu.

Pálmi Rafn Pálmason - Hefur verið aðstoðarþjálfari undanfarna mánuði og var þar áður leikmaður. Er að stíga sín fyrstu skref í þjálfun og hann fær tækifæri til að sanna sig á næstu dögum.

Sigurður Ragnar Eyjólfsson - Annar fyrrum leikmaður KR. Gerði vel með Keflavík á tíma sínum þar en hann hefur komið víða við í þjálfun.