Staðan var markalaus í hálfleik en rétt fyrir lok fyrri hálfleiks lét Anders Christensen, miðvörður Chelsea, reka sig út af og létk Chelsea því manni færra í seinni hálfleik.

Jürgen Klopp beið ekki boðanna og skipti Thiago inn á fyrir Jordan Henderson og var Spánverjinn, sem fékk viðurefnið Samgönguráðherrann, fljótur að koma sér inn í leikinn.

„Hann er æðislegur. Það er æðislegt að fá þennan leikmann í ensku úrvalsdeildina og hvað þá í þetta gæðalið Liverpool. Guð hjálpi hinum liðunum þegar að hann kemst á skrið," segir Margrét Lára Viðarsdóttir, sérfræðingur Vallarins á Síminn Sports, en farið var yfir leikinn í þætti gærkvöldsins.

Thiago var mikið í boltanum og náði á endanum 93 snertingum á boltann og 82 sendingum þrátt fyrir að spila aðeins seinni hálfleikinn. Hvers vegna er það svona merkilegt?

„Þetta var næst hæsta sendingahlutfallið í leiknum á eftir Fabinho. Það að ná 82 sendingum á 45 mínútum, þar af langflestum fram á við, er magnað," segir Freyr Alexandersson, aðstoðarlandsliðsþjálfari Íslands, sem sat á móti Margréti Láru í Vellinum í gærkvöldi.

„Sendingarnar hans voru ekki allar flóknar en hann reyndi samt þrjár sendingar sem ég man eftir sem misheppnuðust bara vegna þess að liðsfélagar hans eiga eftir að átta sig á því að hann getur gefið sendingar sem aðrir geta ekki. Þetta er nefnilega listamaður og það er enginn knattspyrnumaður í heiminum jafn kynþokkafullur með boltann og Thiago," segir Freyr Alexandersson.

Umræðuna um rauða spjaldið og frammistöðu Thiago má sjá hér að neðan.

Kynþokkafulli Samgönguráðherrann fékk mikið lof frá Margréti Láru og @freyrale í Vellinum í gærkvöldi. pic.twitter.com/sdnChUP2Rh

— Síminn (@siminn) September 21, 2020