Atalanta sýndi flotta frammistöðu gegn sterku liði Leverkusen sem búist var við að myndi stjórna úrslitaleiknum, en svo reyndist ekki. Leverkusen átti slakan leik þar sem andstæðingarnir í liði Atalanta virtust betri á öllum sviðum í kvöld.

„Þetta er eitt af bestu kvöldum lífs mins, við unnum titilinn. Við unnum titilinn! Ég veit ekki hvað ég á að segja en þetta er stórkostleg tilfinning. Strákarnir stóðu sig ótrúlega vel í kvöld," sagði Lookman við TNT Sports að leikslokum.

Þetta var þriðji úrslitaleikur Atalanta á tímabilinu og sá fyrsti sem liðið vinnur. Ítalir eru frekar hjátrúarfullir og það eru Nígeríumenn einnig, en Lookman er ættaður frá Nígeríu og hefur núna búið á Ítalíu í tvö ár.

„Þeir segja að maður sé heppinn í þriðja skiptið og það gerðist fyrir okkur í dag. Ég er mjög ánægður með þennan sigur. Við munum 100% fagna þessu í kvöld."

Það er því ljóst að leikmenn Atalanta munu skemmta sér vel eftir þennan sögulega sigur í Dublin. Þetta er fyrsti stóri titill sem Atalanta vinnur síðan 1963 og aðeins sá annar í sögu félagsins.