Tveimur síðustu leikjum kvöldsins er lokið í Bestu deild karla, þar sem FH lagði Fylki að velli á meðan Breiðablik gerði jafntefli við ÍA og mistókst þannig að taka toppsæti deildarinnar.
Lestu um leikinn: Breiðablik 1 - 1 ÍA
Blikar tóku á móti ÍA og voru sterkari aðilinn í fyrri hálfleik og komust afar nálægt því að taka forystuna á 38. mínútu, en Árni Marinó Einarsson bjargaði Skagamönnum og var besti leikmaður vallarins í fyrri hálfleik með sex markvörslur.
Skagamenn fóru vel af stað í síðari hálfleik og tóku forystuna eftir hornspyrnu á 58. mínútu. Marko Vardic skallaði boltann í netið og komst ÍA nálægt því að tvöfalda forystuna skömmu síðar, en Jón Gísli Eyland Gíslason tók ranga ákvörðun í frábærri stöðu.
Blikar héldu boltanum innan liðsins og reyndu að sækja en áttu í miklum erfiðleikum með að brjóta þéttan varnarmúr Skagamanna á bak aftur og tókst það ekki fyrr en á 82. mínútu, þegar þeir fengu dæmda vítaspyrnu í kjölfar hornspyrnu.
Bakfallsspyrna Kristófers Inga Kristinssonar fór í hendina á varnarmanni ÍA og skoraði Höskuldur Gunnlaugsson örugglega af vítapunktinum.
Það var fimm mínútum bætt við venjulegan leiktíma og fengu bæði lið dauðafæri til að skora sigurmark en boltinn rataði ekki í netið. Fyrst átti Dagur Örn Fjeldsted skot rétt framhjá áður en Viktor Jónsson klúðraði dauðafæri á hinum endanum.
Lokatölur urðu því 1-1 og eru Blikar í öðru sæti, með 26 stig eftir 12 umferðir - einu stigi á eftir toppliði Víkings R. og einu stigi á undan Val.
ÍA er í fjórða sæti, með 17 stig.
Breiðablik 1 - 1 ÍA
0-1 Marko Vardic ('58)
1-1 Höskuldur Gunnlaugsson ('82, víti)
Í Hafnarfirði tóku FH-ingar forystuna strax á elleftu mínútu þegar Sigurður Bjartur Hallsson skoraði af stuttu færi. Varnarmenn Fylkis sváfu á verðinum og leyfðu FH-ingum að athafna sig nokkuð frjálslega innan vítateigs til að skora opnunarmarkið.
Lestu um leikinn: FH 3 - 1 Fylkir
Árbæingar svöruðu þó strax með því að komast í dauðafæri, en Orri Hrafn Kjartansson og Emil Ásmundsson klúðruðu báðir fyrir hálfopnu marki. Skömmu síðar setti Vuk Oskar Dimitrijevic boltann í netið en ekki dæmt mark vegna þess að hann notaði handlegginn til að leggja boltann fyrir sig.
Fylkismenn komust aftur í gott færi undir lok fyrri hálfleiks en Nikulás Val Gunnarsson klúðraði eftir að hafa komist einn í gegn á móti Sindra Kristni Ólafssyni, sem gerði mjög vel að verja.
Heimamenn voru því með 1-0 forystu eftir nokkuð jafnan fyrri hálfleik en gestunum tókst að gera jöfnunarmark eftir leikhlé. Arnór Breki Ásþórsson skoraði þá verðskuldað mark fyrir Fylki á 73. mínútu, með bylmingsskoti utan vítateigs.
Staðan var því orðin jöfn en Arnór Borg Guðjohnsen, sem var nýlega kominn inn af bekknum, tók forystuna á nýjan leik fyrir FH skömmu síðar. Arnór var réttur maður á réttum stað þegar boltinn datt fyrir hann innan vítateigs og skoraði með föstu skoti sem var í raun óverjandi.
Kjartan Kári Halldórsson var búinn að eiga góðan leik fyrir FH og innsiglaði hann sigurinn á 85. mínútu með þriðja marki Hafnfirðinga eftir slakan varnarleik Fylkis.
Lokatölur urðu 3-1 og stekkur FH upp í fjórða sæti deildarinnar með þessum sigri. Fylkir er áfram á botninum með 7 stig eftir 11 umferðir.
FH 3 - 1 Fylkir
1-0 Sigurður Bjartur Hallsson ('11)
1-1 Arnór Breki Ásþórsson ('73)
2-1 Arnór Borg Guðjohnsen ('76)
3-1 Kjartan Kári Halldórsson ('85)
Athugasemdir
