„Við getum séð hvaða leikmenn eru ekki upp á sitt besta. Við erum ekki vissir um að allir séu klárir eftir Madrídarleikinn, einhverjir fengu högg í þeim leik," segir Klopp.

„Við viljum gera breytingar og það verða breytingar. Þegar menn koma til baka úr langtímameiðslum þá þarf að sýna skynsemi. Þannig er staðan með Bobby Firmino, Diogo Jota og Virgil van Dijk. Allir halda að Virg sé vélmenni, hann spilaði flesta leiki allra á síðasta ári og alla leikina á HM. Hann meiðist, kemur til baka, spilar, spilar spilar."

Liverpool hefur átt erfitt tímabil og fékk 2-5 skell á heimavelli gegn Real Madrid í fyrri leik liðanna í 16-liða úrslitum Meistaradeildarinnar.

Um leikinn gegn Palace:
„Frammistaða Crystal Palace hefur verið betri en úrslitin hafa sýnt að undanförnu. Liðið býr yfir tækni og hraða, þetta er vel skipulagt lið í 4-2-3-1 kerfi. Ég ber virðingu fyrir því sem þeir hafa gert undanfarin ár. Þetta verður erfitt en allir leikir héðan af eru leikir upp á sæti í Meistaradeildinni," segir Klopp.

Liverpool er sjö stigum frá Meistaradeildarsæti sem stendur.

„Ég hef heyrt að við séum með góðan árangur á Selhurst Park. Þetta eru erfiðir leikir og andrúmsloftið frábært. Palace er virkilega svalt félag sem spilar á mjög svölum leikvangi."