Hann kom inn á tíma sinn hjá Halmstad, þar hafi sér persónulega gengið mjög vel, þar til vel var liðið á tímabilið 2018 þegar hann meiddist.

„Ég fór úr því að verða algjör lykilleikmaður sem spilaði allar mínútur fyrir þjálfarann, fram að sumarhléinu 2018, í það að vera ónotaður í sex leikjum í byrjun tímabils 2019, liðið að skíttapa og þá fór ég á láni heim til Breiðabliks. Stefnan var að fara aftur út, hvort sem það var til Halmstad eða einhvert annað, og það stóð til boða."

„Ég dýrka Halmstad og allt fólkið í bænum, ég lenti í bróðurmissi (2019) og vildi því vera áfram heima á Íslandi."

Höskuldur sagði að leiðirnar hefðu í raun verið tvær eftir missinn, annað hvort svartnætti og volæði eða haldið áfram veginn.

„Mér fannst það einhvern veginn eina leiðin mín og fótboltinn var í raun remedían mín til að vinna úr þessu, þó maður vinni aldrei alveg úr þessu. Fótboltinn er ákveðin festa þegar kippt er undan manni fótunum og maður splundrast í milljón parta. Hann var reipi til að halda í og festa í lífinu. Fyrsta árið var mjög erfitt og maður er í sífellu í einhvers konar 'hide or flight' gír, eins og maður sé í einverju stríði tilfinningalega."

„Ég áttaði mig á því, eftir smá tíma, að ég þyrfti að tala um þetta við fagaðila, viðurkenna fyrir sjálfum mér að maður þarf á aðstoð að halda."

Stefnir í að þetta verði grænt sumar
Höskuldur var næst leiddur inn á komandi tímabil með Breiðabliki. „Síðasta tímabil var hellað álag, burtséð frá stoppi og starti, þá var í persónulega lífinu svolítið mikið álag. Ég finn fyrir extra miklu hungri og finn það á þessum leikjum sem eru núna og inn á æfingasvæðinu, maður finnur að maður er alveg 100%. Mér sýnist það stefna í það að þetta verði grænt sumar."

Mannlega stjórnunin á móti öllum smáatriðunum
Höskuldur var spurður út í muninn á Gústa Gylfa og Óskari Hrafni. Óskar tók við af Gústa eftir tímabilið 2019.

„Gústi er ótrúlegur í því að ná upp í stemningu í hópnu, þessi mannlega stjórnun. Persónugerðin hans er þannig að þú vilt hlaupa í gegnum vegg fyrir hann, það er svona hans helsta sem Gústi hefur. Á meðan Óskar grefur niður í nánast öll smáatriði, með alla tölfræði fyrir framan sig - örugglega einhver fullkomnunarárátta. Á meðan er Dóri (Halldór Árnason) mótvægið í því að þetta fari ekki út í algjörar öfgar."

Að lokum var Höskuldur spurður hvort Breiðablik verði Íslandsmeistari?

„Já, eigum við ekki að segja það."

Sjá einnig:
Hin hliðin - Höskuldur Gunnlaugsson
Höskuldur í útvarpsþættinum Fótbolta.net (11. jan 2020)