Þýska blaðið Bild greindi frá því nú rétt í þessu að kórónuveirusmit hafi komið upp í herbúðum þýska landsliðsins fyrir leikinn við Ísland í kvöld.
Jonas Hofmann, leikmaður Gladbach, ku hafa greinst smitaðir í kórónuveiruprófi sem leikmenn fóru í.
Leikmenn þýska landsliðsins eru nú í úrvinnslusóttkví inni á hótelherbergjum á meðan er verið að skoða stöðuna fyrir framhaldið.
Þýskaland á að mæta Íslandi í fyrsta leik í undankeppni HM klukkan 19:45 í kvöld.
Þýska liðið ætlaði að taka létta morgunæfingu fyrir leikinn en þeirri æfingu hefur nú verið aflýst.
„Við vitum bara þetta sem hefur komið fram í fréttum og málið er í skoðun. Við bíðum bara frétta," sagði Ómar Smárason fjölmiðlafulltrúi KSÍ við Fótbolta.net.
Að sögn Bild er möguleiki eá að allir leikmenn þýska liðsins verði sendir aftur í kórónuveirupróf í dag og leikurinn fari fram ef leikmenn greinast neikvæðir þar. Það er þó ekki staðfest ennþá.
Samkvæmt reglum UEFA á leikurinn að fara fram ef fjórtán leikmenn Þýskalands, þar af einn markvörður, eru utan sóttkvíar og geta spilað.
Athugasemdir