Ronaldo, sem er 37 ára gamall, hefur ekki enn æft undir stjórn Erik ten Hag, en hann ferðaðist ekki með liðinu til Ástralíu og Taílands í æfingabúðir eins og restin af leikmannahópnum.

Félagið greindi frá því að Ronaldo væri ekki með af fjölskylduástæðum en hann hefur haldið sér við í heimalandi sínu síðustu vikur.

Athletic segir frá því í dag að Ronaldo snýr aftur til Manchester-borgar í dag og mun funda með félaginu framtíð sína, en hann hefur þegar tjáð félaginu að hann vilji fara og vonast til að það samþykki sanngjörn tilboð í sig.

United hefur hingað til sagt að hann sé ekki til sölu og lítur Ten Hag á Ronaldo sem mikilvægan part af leikmannahópnum.

Ekki er ljóst hvort hann æfi með liðinu á morgun en hann mun að minnsta kosti ræða við Ten Hag á næstu dögum. United telur það jákvætt skref að Ronaldo sé á leið aftur til Manchester og segja heimildarmenn Athletic að það sé afar líklegt að hann verði áfram en málin ættu að skýrast betur í vikunni.

Spænskir miðlar segja Atlético Madríd hafa mikinn áhuga á að fá Ronaldo og er þar einnig haldið fram að United væri til í að lána hann í eitt tímabil með því skilyrði að hann framlengi samning sinn til 2024. Hann hefur einnig verið orðaður við Bayern München, Chelsea, Roma og Sporting.