Fulham hefur ekki átt gott sumar á leikmannamarkaðinum og heldur þjálfari liðsins Marco Silva áfram að hamra á því á fréttamannafundum.
Silva segir að liðið þurfi á nýjum leikmönnum að halda fyrir lok félagaskiptagluggans í byrjun september. Hann segir að Fulham þurfi að minnsta kosti þrjá nýja leikmenn á næstu dögum.
Varamarkvörðurinn Benjamin Lecomte er eini leikmaðurinn sem Fulham hefur fest kaup á í sumar.
„Við höfum rétt rúma viku til að laga hópinn. Við þurfum að minnsta kosti þrjá nýja leikmenn fyrir gluggalok," sagði Silva eftir 1-1 jafntefli gegn Manchester United um helgina.
Fulham sýndi flotta frammistöðu gegn Rauðu djöflunum og er með tvö stig eftir tvær fyrstu umferðirnar á nýju úrvalsdeildartímabili.
„Það er mikið af leikjum framundan og við erum að glíma við einhver meiðslavandræði. Okkur vantar fleiri menn í ákveðnar stöður, annars munum við lenda í vandræðum á tímabilinu."
Fulham vantar í það minnsta einn miðjumann og einn vinstri kantmann til að fullkomna hópinn hjá sér.
16.08.2025 09:20
Marco Silva mjög ósáttur með sumarið
Athugasemdir
