„Þetta er eins sárt og það verður, það er ekki hægt að lýsa því, mér líður bara eins og tímabilið sé búið," sagði Jón Dagur Þorsteinsson eftir tap Íslands gegn Úkraínu í kvöld í úrslitaleik um sæti á EM.
Lestu um leikinn: Úkraína 2 - 1 Ísland
„Fram að fyrsta markinu fannst mér við vera flottir en auðvitað þungt að fá á sig þetta seinna mark. Við vorum ennþá inn í þessu og uppleggið gekk vel en það voru bara þessi tvö móment," sagði Jón Dagur.
Það var nóg að gera hjá Jóni Degi í leiknum en hann varðist vel og átti tvö frábær skot sem Lunin í marki Úkraínu varði hrikalega vel. Þessi skot sem Lunin varði, varstu að sjá þetta inni?
„Mér leið þannig en því miður fannst mér eins og hann hafi verið búinn að lesa þetta fyrirfram," sagði Jón Dagur.
Aðspurður hvort hann sjái þetta lið fara lengra svaraði hann stutt og hnitmiðað: „Auðvitað, annars myndum við ekki nenna þessu," sagði Jón Dagur að lokum.
