Lestu um leikinn: KR 1 -  1 Breiðablik

KR og Breiðablik áttust við í spennandi slag í eina leik dagsins í Bestu deild karla og var staðan markalaus þar til undir lok fyrri hálfleiks.

Bæði lið fengu góð færi til að taka forystuna en það var Matthias Præst sem kom boltanum í netið á 44. mínútu. Hann skoraði af mikilli yfirvegun úr góðu færi eftir frábæran undirbúning frá Jóhannesi Kristni Bjarnasyni.

Bæði lið komu sér í góðar stöður í upphafi síðari hálfleiks en það voru Blikarnir sem skoruðu næsta mark þegar Ágúst Orri Þorsteinsson jafnaði metin á 58. mínútu.

Ágúst gerði mjög vel að skora eftir flotta sendingu innfyrir frá Antoni Loga Lúðvíkssyni, eftir að hafa stungið Ástbjörn Þórðarson af á vinstri vængnum.

KR-ingar vildu fá vítaspyrnu á 77. mínútu þegar boltinn fór í höndina á Valgeiri Valgeirssyni innan vítateigs en ekkert var dæmt.

Heimamenn í KR voru líklegra liðið á lokakaflanum og átti Aron Sigurðarson meðal annars skot í stöng. Fyrirliðinn var afar líflegur í leiknum og óheppinn að skora ekki, svo lokatölur urðu 1-1 eftir frábæran slag í Vesturbænum.

Blikar fara tímabundið upp á topp Bestu deildarinnar, þar sem þeir eru komnir einu stigi uppfyrir Val og Víking R. sem eiga þó leik til góða.

KR sýndi flotta frammistöðu en situr ennþá í fallsæti - með 17 stig eftir 16 umferðir.

Leikurinn fór fram á nýjum Meistaravöllum og mættu rúmlega 3000 áhorfendur.