Völsungur vann öruggan 4-0 sigur á Selfossi í nýliðaslagnum í Lengjudeild karla á PCC-vellinum á Húsavík í dag. Jakob Héðinn Róbertsson gerði sér lítið fyrir og skoraði þrennu fyrir heimamenn.

Það tók Jakob aðeins níu mínútur að skora fyrsta mark leiksins en það gerði hann eftir sendingu frá nýja manninum, Sergio Parla Garcia, sem setti boltann á milli varnarmann og á Jakob sem kláraði af yfirvegun.

Jakob var aftur á ferðinni á 33. mínútu. Í þetta sinn var það Elmar Örn Guðmundsson sem kom boltanum á milli varnarmanna og aftur kláraði hann frábærlega í hægra hornið.

Elfar Árni Aðalsteinsson komst nálægt því að bæta við þriðja markinu er hann fékk boltann við vítapunktinn en þrumuskot hans hafnaði í þverslá.

Sannfærandi hjá heimamönnum sem fóru með tveggja marka forystu inn í hálfleikinn en vont versnaði hjá Selfyssingum er Alfredo Sanabria fékk að líta rauða spjaldið í upphafi síðari hálfleiks er hann tók Jakob niður sem var að sleppa inn fyrir. Alfredo fékk sitt annað gula og Selfyssingar manni færri.

Heimamenn voru með yfirráð og héldu áfram að skapa sér færi en náðu ekki að gera almennilega út um leikinn fyrr en á síðustu tíu mínútunum.

Jakob fullkomnaði þrennuna á 81. mínútu. Arnar Pálmi Kristjánsson kom með sendingu frá vinstri vængnum og á Jakob sem lék á varnarmann og skoraði. Tveimur mínútum síðar gerði Ismael Salmi Yagoub fjórða og síðasta mark heimamanna eftir aðra stoðsendingu Arnars og þar við sat.

Völsungur er með 17 stig í 7. sæti en Selfoss í 9. sæti með 13 stig.