„Ég er rosa sáttur. Það var vitað fyrirfram að þetta yrði erfiður leikur sem kom á daginn. Við vorum fljótir að vera þreyttir sem mér finnst skrýtið því það eru 5 dagar síðan við spiluðum síðast, það er lengri hvíld en við höfum fengið vanalega.“ sagði Rúnar Kristinsson, þjálfari Fram, eftir 2-0 sigur á ÍBV í dag.
Lestu um leikinn: Fram 2 - 0 ÍBV
Rúnar var ekki sáttur með nýtingu liðsins á þeim góðu stöðum sem þeir komust í nokkrum sinnum í seinni hálfleiknum.
„Við skorum heppnismark í fyrsta markinu og skorum svo gott annað mark. Það var jafnvægi með liðunum í fyrri hálfleik, Eyjamenn sterkari en við í síðari hálfleik hvað það varðar að halda í boltann en þeir sköpuðu sér varla færi. Við eigum tvo algjöru deddara í seinni hálfleik til að skora. Mér fannst við bara gera illa í skyndisóknunum okkar.“
Framarar skoruðu snemma en Rúnar segir að það hafi bjargað þeim þar sem hann skynjaði mikið þreytumerki í liðinu í leiknum.
„Það bjargaði okkur algjörlega að skora svona snemma og komast í þessa stöðu. Það er ekki auðveldara að hvíla sig án boltans það er auðveldara að hvíla sig með hann en við erum settir í þá stöðu að þurfa að verjast vel. Eyjamenn eru með góða leikmenn og gott skipulag og þeir þrýstu okkur hérna niður en við vorum ágætlega sáttir í stöðunni og sáum þá ekki finna miklar opnanir á okkur. Þetta snýst um að halda hreinu, vinna leikinn og halda áfram okkar vegferð.“
Rúnar hefur séð mikla bætingu og stíganda í leik Framara í undanförnum leikjum.
„Frammistöðulega séð erum við búnir að vera flottir undanfarið en ætlum að reyna að halda því áfram. Við erum að reyna að bæta okkur frá því í fyrra, sjá einhvern stíganda í því sem við erum að gera. Það er mikil trú í liðinu núna. Það eru strákar sem eru að berjast um sætið sitt í liðinu. Það er hugur í mönnum og ánægja og gleði þegar vel gengur, þegar þú nærð í úrslit eins og í dag þá er þetta eitthvað sem gefur manni sjálfstraust og trú.“
Viðtalið við Rúnar má finna í heild sinni í spilaranum hér að ofan
Athugasemdir
