Lazio er að krækja í Matías Vecino á frjálsri sölu eftir að samningur hans við Inter rann út um síðustu mánaðamót.
Vecino er 30 ára gamall landsliðsmaður Úrúgvæ sem lék 127 leiki á fimm árum hjá Inter og 60 fyrir landsliðið.
Vecino er hávaxinn og sterkur miðjumaður sem hefur einnig leikið fyrir Fiorentina, Empoli og Cagliari í ítalska boltanum.
Hann verður sjöundi leikmaðurinn sem bætist við leikmannahóp Maurizio Sarri í sumar og mun berjast við Danilo Cataldi um sæti í byrjunarliðinu.
Lazio er þá búið að selja sóknarmanninn Vedat Muriqi til Mallorca. Leikmaðurinn var á leið til Club Brugge fyrr í mánuðinum en féll á læknisskoðun við vafasamar aðstæður.
Mallorca borgar um 10 milljónir evra fyrir Muriqi sem fann aldrei taktinn hjá Lazio og skoraði aðeins 2 mörk í 49 leikjum.
Þessi öflugi landsliðsmaður Kósovó var lánaður til Mallorca í janúar fyrir eina milljón evra og átti hann þátt í að bjarga félaginu frá falli.
Muriqi skoraði 5 mörk í 16 deildarleikjum og er núna fluttur til Mallorca.