Sjáðu sturlaðan fögnuð Víkinga eftir flautumark Tarik

Víkingur og Breiðablik leiðast hlið við hlið á toppi Bestu deildarinnar og það er svo sannarlega meistarabragur á báðum liðum.

Breiðablik vann FH í gær og Víkingur fylgdi því svo eftir með því að vinna endurkomusigur gegn Val um kvöldið. Víkingur vann 3-2 en Tarik Ibrahimagic, sem skoraði tvö mörk í leiknum, tryggði sigurinn með flautumarki í lokin.

Stuðningsmaður Víkings fékk sér svo Guinness til að fagna sigrinum og lét prenta mynd af Tarik og Kára Árnasyni á froðuna.

„VÁÁÁÁÁ!!! Daði Berg gefur boltann út í teiginn á Tarik sem setur boltann í fjær og tryggir Víkingum sigurinn,“ skrifaði Kári Snorrason í textalýsingu frá leiknum.

Víkingur birti skemmtilegt myndband af marki Tarik og þeim fögnuði sem braust út í kjölfarið.