,,Ég var hér sem ungur krakki og líka sem meistaraflokksmaður þannig að ég er kominn á heimaslóðir," sagði Ólafur Jóhannesson fyrrum landsliðsþjálfari eftir að hafa skrifað undir samning við Hauka í dag.
,,Hér hefur verið unnið frábært yngri flokka starf. Það er mikið af ungum leikmönnum hér núna og það var það sem mig langaði að fara í. Mig langaði að fara og þjálfa og eiga þess kost að búa til lið eftir mínu höfði með yngri leikmönnum og ná í eldri leikmenn með reynslu og ég fæ það hér."
Haukar enduðu í þriðja sæti í sumar en stefnan næsta sumar er að vera með lið sem getur barist um sæti í Pepsi-deildinni.
,,Það verður að koma í ljós seinna en við stefnum að því að vera með lið sem á möguleika á því."
Um leið og Ólafur skrifaði undir í dag var Sigurbjörn Hreiðarsson kynntur til sögunnar sem spilandi aðstoðarþjálfari.
,,Ég vildi fá reynslumenn til að vera í kringum mig inni á vellinum og Bjössi er einn af þeim. Hann er gríðarlega sterkur karakter og gerir leikmennina í kringum sig betri," sagði Ólafur sem ætlar að fá fleiri reynslubolta til Hauka.
,,Ég stefni sannarlega að því. Nú er maður orðinn tölvuvæddur þannig að maður sendir bara skeyti."
Ólafur ætlar þó ekki að nýta sér samskiptasíðuna Twitter til að fá leikmenn. ,,Ég kann það nú ekki ennþá en eitthvað kann ég," sagði Ólafur léttur í bragði.
Hér að ofan má sjá viðtalið í heild sinni.
