Sam Tillen
Sam Tillen.
Sam Hewson er einn af fjórum erlendu leikmönnum Fram.
Það var áhugavert að sjá ummæli um fjölda útlendinga hér á landi eftir leik Selfoss og ÍBV. Þar sem ég er sjálfur erlendur leikmaður og bróðir minn spilar með Selfyssingum þá gerði það þetta ennþá áhugaverðara fyrir mig. Ég veit, og fólk sem er í boltanum veit það líka, að Selfyssingar reyndu að fá íslenska leikmenn til liðs við sig en þeir ýmist höfnuðu þeim eða leikmenn voru með of háar launakröfur. Fyrir félag sem var að koma upp og missti nokkra leikmenn frá síðasta tímabili þá þurfti að búa til hóp til að keppa í þessum gæðaflokki og það með litlum fjárhag. Með því að fá erlenda leikmenn fengu þeir 2-3 eða jafnvel 4 erlenda leikmenn fyrir sama kostnað og einn íslenskan leikmann. Sumir af erlendu leikmönnunum þeirra hafa reynslu af því að spila í úrvalsdeildinni í Noregi. Auðvitað vill enginn sjá lið með marga erlenda leikmenn í íslensku úrvalsdeildinni. Hins vegar hafa Logi, Auðun og stjórnin talið að þetta væri besta leiðin á fyrsta tímabili í deildinni á nýjan leik. Ég er viss um að ef þeir festa sig í sessi á næstu einum til tveimur árum þá muni fjöldi erlenda leikmanna hjá þeim minnka. Kannski verða íslenskir leikmenn viljugri til að spila þarna og fara frá öðrum félögum í Pepsi-deildinni til þeirra.
Ef við tökum Fram sem dæmi þá höfum við 4 erlenda leikmenn innan okkar raða. Mér finnst það persónulega vera fín tala. Munu Kjartan Henry eða Óskar Örn yfirgefa KR til að koma og spila með okkur? Ég myndi vilja það en svarið er nei. Til að bæta hópinn þarftu stundum að leita út fyrir landsteinana. Öll lið í heimi gera það nema Athletic Bilbao. Fram hefur ekki fjárhagslega burði til að kaupa upp samninga hjá bestu íslensku leikmönnunum frá KR og FH og því leituðu þeir annað, til Bretlands og fengu 3 leikmenn.
Það má taka fram að fótboltaheimurinn og heimurinn í heild sinni er að verða minni. Ísland er í Schengen og Evrópusambandið hefur gert fólki auðveldara að færa sig um set. Í Englandi hefur fjöldi erlendra leikmanna aukist gífurlega og það sama má segja um íslenska leikmenn sem spila erlendis. Þegar íslenskur leikmaður flytur erlendis er hann eða hún að stöðva framfarir innfædds leikmanns í því landi, hvort sem það er Svíþjóð, Noregur, Danmörk eða England. Það er staðreynd sem má ekki gleyma. Á Englandi voru 38,6% af þeim 246 leikmönnum sem spiluðu í fyrstu umferð ensku úrvalsdeildarinnar frá Englandi. Fram til 17-18. september höfðu 396 leikmenn komið við sögu í deildinni og þar voru einnig 38,6% enskir. Ég vil ekki sjá þetta gerast hér og þetta mun aldrei gerast.
Það getur verið áhætta að vera með erlenda leikmenn, sumir sem koma hingað gæti ekki verið meira sama og ég hef heyrt orðróm um menn sem drekka fyrir leiki og reyna að byrja slagsmál í bænum til dæmis. Enginn vill slíka leikmenn hingað. Hins vegar er ég stoltur af þeim sem ég spila með. Ég veit að þeim er annt um Fram og þeir gera allt sem þeir geta til að vera eins góðir leikmenn og hægt er. Al, Lenny og Hewsy hafa allir bætt við gæðum í lið okkar og haft jákvæð áhrif. Það er ekki hægt að segja að allir erlendir leikmenn séu slæmir fyrir deildarkeppr. Ég veit að meðan ég er hér þá er ég mögulega að koma í veg fyrir að Íslendingur spili. Persónulega verður það til þess að ég legg ennþá harðar að mér til að réttlæta að ég sé hér.
Ég held að það megi einnig benda á að margir Íslendingar fóru til Noregs í vinnu til að forðast kreppuna. Enginn myndi efast um rétt þeirra til að flytja þar sem þeir geta fengið vinnu og útlitið er betra fyrir fjölskylduna. Það sama á við um fótboltamenn, þeir eru að hafa fyrir sér og í Bretlandi eru allt of margir leikmenn. Á hveru ári eru í kringum 500 samningslausir leikmenn á Englandi bara úr liðunum í deildarkeppninni. Það er bara eðlilegt að þeir leiti fyrir sér annars staðar ef að tækifæri býðst. Ef fólk fengi ekki að búa, vinna og læra í öðrum löndum þá væri leiðinlegt að búa í þessum heimi.
Athugasemdir
