Real Madrid og Barcelona eigast við í stórleik kvöldsins á Spáni. El Clasico viðureignin fer fram á Santiago Bernabeu en seinni leikurinn verður spilaður á Camp Nou í byrjun apríl.
Byrjunarliðin hafa verið tilkynnt og gerir Carlo Ancelotti tvær breytingar frá 1-1 jafntefli gegn Atletico Madrid um síðustu helgi.
Eduardo Camavinga og Luka Modric koma inn í byrjunarliðið fyrir Dani Ceballos og Marco Asensio.
Barcelona hefur tapað tveimur leikjum í röð og gerir Xavi fimm breytingar frá óvæntu tapi gegn Almeria í síðustu umferð deildartímabilsins. Hann skiptir allri varnarlínunni út og þá kemur Raphinha inn í liðið fyrir meiddan Robert Lewandowski.
Ousmane Dembele og Pedri eru einnig á meiðslalista Börsunga á meðan Real Madrid er án Ferland Mendy og David Alaba.
Liðin eigast við í undanúrslitum og mæta annað hvort spútnik liði Osasuna eða Athletic Bilbao í úrslitaleiknum.
Síðasti El Clasico slagur var 15. janúar þegar Barcelona vann flottan sigur í úrslitaleik Ofurbikarsins. Real er með sama lið og í því tapi, að undanskildum Nacho Fernandez sem tekur stöðu Ferland Mendy í vinstri bakverði í fjarveru David Alaba.
Barca er með sex leikmenn sem spiluðu úrslitaleikinn í byrjunarliðinu í kvöld.
Real Madrid: Courtois, Carvajal, Militao, Rudiger, Fernandez, Modric, Camavinga, Kroos, Valverde, Vinicius Jr, Benzema
Barcelona: Ter Stegen, Araujo, Kounde, Alonso, Balde, Kessie, Busquets, De Jong, Gavi, Raphinha, Torres
