Andi Hoti hér til vinstri. Með honum á myndinni er Róbert Quental Árnason.
Miðvörðurinn Andi Hoti mun spila með uppeldisfélagi sínu, Leikni, í sumar eftir að hafa leikið með Aftureldingu og Þrótti á láni undanfarin tvö tímabil.
Andi er á tuttugasta aldursári en hann þykir gríðarlega efnilegur hafsent. Hann á að baki sjö leiki fyrir yngri landslið Íslands en þeir voru allir með U19 landsliðinu. Hann er núna í U21 æfingahóp.
Sigurður Heiðar Höskuldsson, fyrrum þjálfari Leiknis, var gestur í útvarpsþættinum Fótbolta.net síðasta laugardag en hann segir að Andi sé besti ungi leikmaður Lengjudeildarinnar.
„Andi Hoti er að koma til baka eftir að hafa fengið tvö tímabil í meistaraflokki. Hann er unglingalandsliðsmaður og fyrir mér er hann besti ungi leikmaðurinn í þessari deild," sagði Sigurður í þættinum.
„Hann gæti verið einn besti hafsent deildarinnar í sumar," bætti Sigurður við.
Leikni var spáð þriðja sæti í ótímabæru spánni fyrir Lengjudeildina í útvarpsþættinum. „Ég er rosalega spenntur fyrir því sem er í gangi þarna."
Hægt er að hlusta á umræðuna úr útvarpsþættinum í heild sinni hér fyrir neðan.
Athugasemdir
