„Þeir hafa breyst í úrslitavél. Þeir ná að kreista fram úrslitin með góðri frammistöðu. Liðið spilar toppfótbolta og ef liðið spilar ekki sinn besta leik nær það samt úrslitum. Þess vegna eru þeir á þessum stað. Liðið er í harðri baráttu um að vinna deildina," segir Klopp.

Samgleðst Rashford
Enski sóknarmaðurinn Marcus Rashford hefur verið á skotskónum hjá United og er einn allra heitasti sóknarmaður heims.

„Það er ómögulegt að vera ánægður með eitthvað sem er jákvætt hjá Manchester United. En ég samgleðst Rashford því hann átti erfitt uppdráttar síðasta tímabil og náði sér ekki á strik. Hann er að spila ótrúlega vel, hraðinn hans og tæknin. Þetta er blanda af öllu. Hversu öruggur hann er fyrir framan markið. Hann skorar heimsklassa mörk, hann skorar einföld mörk, hann getur skallað. Hann er samt ekki eini heimsklassa leikmaðurinn í liðinu," segir Klopp.

„Ég er mjög hrifinn af Bruno Fernandes, hreyfingar hans eru mjög klókar. Ég er mjög hrifinn af því hvernig hann birtist allt í einu. Casemiro og Fred eru einnig að ná vel saman og svo eru skyndisóknirnar einnig vopn sem þeir eru með. Miðað við leikmennina sem eru fengnir er augljóst að þetta lið er ekki byggt upp fyrir næstu áratugi ef horft er til leikmanna sem hafa verið keyptir. Þeir eru fengnir fyrir núið og núna er liðið virkilega gott."

Varðandi stöðuna á sínum leikmannahópi segir Klopp að ekkert hafi bæst á meiðslalistann, Thiago og Luis Díaz eru enn fjarri góðu gamni.