Ronaldo, sem er fyrirliði og fastamaður í fremstu víglínu hjá Al-Nassr, fékk nokkur frábær færi til að skora í fyrri hálfleiknum gegn Al-Batin en klikkaði.

Eftir að liðið lenti 1-0 undir komst Ronaldo einn gegn markverði en hann sólaði markvörðinn og skaut boltanum á markið en varnarmaður Al-Batin var fljótur að átta sig og bjargaði á línu.

Yfirburðir Al-Nassr skiluðu jöfnunarmarki í uppbótartíma síðari hálfleiks en það var ekki Ronaldo sem skoraði markið heldur var það Abdulrahman Ghareeb sem gerði það eftir fyrirgjöf Luiz Gustavo.

Mohammed Al Fatil skoraði annað mark Al-Nassr á tólftu mínútu í uppbótartíma með skoti úr teignum áður en Mohammed Maran gulltryggði sigurinn stuttu síðar.

Al-Nassr heldur því toppsætinu en liðið er með 46 stig, tveimur stigum meira en Al-Ittihad þegar nítján umferðir eru búnar af deildinni.