Vegna kórónaveirunnar hafa áhorfendur ekki fengið að mæta á völlinn á þessari leiktíð.

UEFA hefur unnið að því að leyfa áhorfendur aftur og hefur sambandið komist að samkomulagi við pólsk yfirvöld um að leyfa áhorfendur á úrslitaleik Evrópudeildarinnar.

9500 áhorfendur fá að mæta á Stadion Miejski-leikvanginn í Gdansk en stuðningsmenn þurfa annað hvort að sýna fram á vottorð um bólusetningu eða fara í tíu daga sóttkví við komuna til landsins.

Miðasala á úrslitaleikinn er hafin en það kemur í ljós á fimmtudaginn hvaða lið mætast í úrslitum. Manchester United vann Roma 6-2 í fyrri leik liðanna í undanúrslitum á meðan Villarreal vann Arsenal 2-1.