Jason Daði átti flottan leik með Grimsby
Landsliðsmaðurinn Aron Einar Gunnarsson spilaði í 3-0 tapi Al Gharafa gegn Al Hilal í Meistaradeild Asíu í kvöld.
Aron Einar var í byrjunarliði Al Gharafa sem hafði aðeins unnið einn leik í keppninni fyrir leikinn í kvöld.
Sádi-arabísku meistararnir í Al Hilal voru með algera yfirburði í leiknum og unnu nokkuð auðveldan sigur. Marcos Leonardo, Aleksandar Mitrovic og Sergej Milinkovic-Savic skoruðu mörk heimamanna sem eru með 16 stig í efsta sæti deildarinnar en Al Gharafa í 10. sæti með 4 stig.
Aron Einar fór af velli á 55. mínútu en hann var að spila fjórða leik sinn fyrir félagið í keppninni.
Jason Daði Svanþórsson byrjaði hjá Grimsby Town sem vann 5-2 sigur á Accrington Stanley í ensku D-deildinni. Mosfellingurinn átti frábæran leik á vængnum.
Hann tók góð hlaup og var að fara illa með varnarmenn Accrington í leiknum. Þegar rúmur hálftími var liðinn fiskaði hann vítaspyrnu fyrir sitt lið og var það Jordan Davies sem tók spyrnuna og kom Grimsby í 4-0.
Jason var óheppinn að skora ekki í leiknum. Sending kom fyrir markið þar sem Jason var klár í að pota boltanum í netið en Sonny Aljofree, leikmaður Accrington, fór fyrir boltann og setti hann í eigið net.
Annars flottur leikur hjá fyrrum Blikanum sem fer með Grimsby upp í 7. sæti með 28 stig.
Athugasemdir
