Víkingur R. hefur styrkt sig fyrir komandi átök í Bestu deildinni en Ísfold Marý Sigtryggsdóttir er komin til félagsins frá Þór/KA.
Ísfold er fædd árið 2004 og uppalin í KA en hún kom inn í lið Þórs/KA árið 2019 og hefur síðan spilað 97 leiki með meistaraflokki liðsins.
Á síðasta tímabili spilaði hún 14 leiki í Bestu deildinni og skoraði 2 mörk.
Víkingur greinir frá því á heimasíðu sinni að Ísfold sé nú mætt til félagsins frá Þór/KA en hún skrifaði undir samning út 2026.
„Ísfold er ung en á sama tíma mjög reynslumikill leikmaður. Hún passar fullkomlega inn í verkefnið okkar hér í Víkinni og við erum í skýjunum að fá hana í hópinn. Velkomin í fjölskylduna og í Hamingjuna Ísfold!“ sagði John Andrews, þjálfari Víkings, um nýja leikmanninn.
Víkingur hafnaði í 3. sæti Bestu deildarinnar á síðasta tímabili með 36 stig.
Athugasemdir
