Fréttamannafundur Íslands í Úkraínu
Frá fréttamannafundinum í dag.
„Undirbúningurinn hefur verið afslappaður en æfingarnar snarpar og góðar. Það er verið að koma mönnum í gírinn eftir langt og strangt sumar," segir landsliðsfyrirliðinn Aron Einar Gunnarsson.
Aron sat fyrir svörum ásamt Heimi Hallgrímssyni landsliðsþjálfara á fjölmennum fréttamannafundi íslenska liðsins á Ólympíuleikvanginum í Kænugarði. Þar leikur Ísland sinn fyrsta leik í undankeppni HM í kvöld, gegn Úkraínu.
Sjáðu fundinn í heild sinni hér að ofan
Kolbeinn Sigþórsson verður ekki með í leiknum vegna meiðsla í hné en Heimir sagði á fréttamannafundinum að það myndi ekki breyta neinu varðandi leikáætlun liðsins í leiknum.
„Það er auðvitað erfitt að missa leikmann eins og Kolbein," segir Aron Einar. „Hann er varafyrirliði okkar og er góður leikmaður sem lék vel á EM. En þetta er staðreynd og maður kemur í manns stað. Aðrir sóknarmenn okkar hafa lagt mikið á sig til að komast í liðið og nú er komið að þeim að sýna sig. Það er mikil samkeppni í hópnum og það er bara hollt. Menn eru tilbúnir að stíga upp."
„Ég vil fá hungur og vilja áfram í þetta. Baráttu fyrir okkar þjóð. Við höfum margoft sýnt að við erum í þessu til að leggja okkur fram fyrir þjóðina og það verður að halda áfram. Þó við höfum verið hátt uppi í sumar þá viljum við finna þá tilfinningu aftur. Næsta verkefni hjá okkur er að reyna að komast á HM," segir Aron en fundurinn er í heild hér að neðan.
Athugasemdir
