Ragnar Gíslason, þjálfari HK/Víkings
„Þetta var náttúrulega bara gríðarleg barátta og tvö góð lið. Bæði lið held ég að hafi viljað vinna og bæði lið fengu fín færi þannig að þetta var bara hörkuleikur og jafn leikur,“ sagði Ragnar Gíslason, þjálfari HK/Víkings eftir markalaust jafntefli í fyrri viðureign HK/Víkings og KR en liðin berjast um laust sæti í Pepsi-deildinni að ári.
Ragnar segir ákveðin vonbrigði að hafa ekki náð sigri en lagði áherslu á hve gott það væri að halda hreinu.
„Auðvitað eru það alltaf vonbrigði en að sama skapi er gott að fá ekki á sig mark. Í þessu gildir náttúrulega útivallarreglan og 1-1 vestur í bæ fleytir okkur áfram en vissulega hefði ég viljað fá 1-2 í dag. Ekki nokkur spurning.“
„Mér fannst mjög góð barátta og allir að leggja sig mjög vel fram. Þetta var náttúrulega titringur og stress til að byrja með og það tók þær alveg 20-25 mínútur að ná því úr sér. Heilt yfir er ég bara ánægður með þær.“
„Við erum ekkert hrædd við að fara vestur í bæ. Vonandi verður jafnmikil barátta og jafn skemmtilegur leikur.“
Fjölmargir stuðningsmenn beggja liða voru mættir í Víkina og Ragnar var ánægður með það.
„Já, virkilega. Það var mjög gaman að sjá. Fínn stuðningur, bæði fyrir okkur og KR-ingana. Bara mjög gaman.“
Eitt atvik setti svartan blett á annars skemmtilegan fótboltaleik en tveir leikmenn þurftu að yfirgefa völlinn vegna höfuðmeiðsla. Við spurðum Ragnar að lokum út í stöðuna á Lidiju Stojkanovic sem fékk skurð á höfuðið og þurfti að fara af velli.
„Nei. Ég veit það ekki nákvæmlega. Það var skurður á enninu og hann var ekkert sérstaklega fallegur en vonandi verður hún klár fyrir næsta leik en það verður bara að koma í ljós.“
Hægt er að horfa á viðtalið við Ragnar í sjónvarpinu hér að ofan.
Athugasemdir
