Hannes Þór Halldórsson, aðalmarkvörður íslenska landsliðsins, var á línunni í útvarpsþættinum Fótbolta.net á laugardag.
Hann ræddi þar um komandi landsleik gegn Ungverjalandi í næstu viku. Það er úrslitaleikur um sæti á EM, en leikurinn fer fram í Ungverjalandi.
Hannes, Kári Árnason og Birkir Már Sævarsson hafa ekkert spilað síðan í síðasta landsliðsverkefni og þeir hafa einnig ekki mátt æfa venjulega undanfarna daga samkvæmt reglum á Íslandi.
Ísland mun æfa í Augsburg í Þýskalandi fyrir leikinn gegn Ungverjalandi. Hannes telur að það verði ekki vandamál að hann hafi ekki spilað í um mánuð þegar komið er út í leikinn gegn Ungverjum.
„Þetta er ekki í fyrsta skipti sem ég þarf að fara óhefðbundnar leiðir til að halda mér í standi fyrir landsleik," sagði Hannes.
„Það hefur oft gerst áður að það þurfi að brúa eitthvað mánaðarbil, spila á undirbúningstímabili eða eitthvað svoleiðis. Ég held að það verði ekkert mál. Það hefur oft verið þannig með okkur í landsliðinu; það er allur gangur á því hvernig standi menn eru í en einhvern veginn virðist það vera þegar á hólminn er komið að þá smellur það hjá okkur."
„Ég held að það verði nákvæmlega þannig hjá okkur sem höfum þurft að halda okkur í formi síðustu vikur."
Hlusta má á útvarpsþáttinn í heild sinni hér að neðan.
Athugasemdir