Schalke er án taps í síðustu sjö leikjum sínum eftir að liðið gerði 2-2 jafntefli við Borussia Dortmund í grannaslag í þýsku deildinni í dag.

Nico Schlotterbeck kom Dortmund yfir á 38. mínútu með glæsilegu skoti rétt fyrir utan teiginn eftir sendingu frá Raphael Guerreiro en Schalke svaraði strax í byrjun síðari hálfleiks.

Michael Frey fékk boltann hægra megin við teiginn og sá að Marius Bulter var kominn í hlaupið á fjærstönginni. Frey kom með gullfallega sendingu þvert fyrir markið og var eftirleikurinn auðveldur.

Tíu mínútum síðar kom Guerreiro liði Dortmund aftur í forystu eftir að Emre Can fann hann í opnu svæði fyrir framan markið. Guerreiro tók við boltanum og afgreiddi hann í netið.

Schalke skemmdi teiti Dortmund-manna því þegar ellefu mínútur voru eftir gerði Kenan Karaman jöfnunarmarkið með föstum skalla úr teignum eftir fyrirgjöf frá vinstri.

Lokatölur 2-2. Schalke er nú taplaust í síðustu sjö deildarleikjum en situr samt sem áður í 17. sæti með 20 stig. Magnaður árangur eftir áramót hjá liði sem virtist ekki eiga möguleika á að berjast um sæti í deildinni. Dortmund er í öðru sæti með 50 stig, tveimur stigum á eftir toppliði Bayern. Dortmund hefur ekki tapað deildarleik í síðustu níu leikjum.