Gian Piero Gasperini, stjóri Atalanta, og Ademola Lookman, leikmaður liðsins, voru ekki beint bestu vinir í síðasta mánuði eftir að Gasperini gagnrýndi leikmanninn fyrir að klúðra vítaspyrnu í leik gegn Club Brugge í Meistaradeildinni.
Atalanta tapaði viðureigninni og féll úr leik í umspili um sæti í 16-liða úrslitum Meistaradeildarinnar.
Gasperini hrósaði Lookman hins vegar eftir sigur liðinsins á Juventus um helgina. Lookman innsiglaði 4-0 sigur liðsins gegn Juventus með marki þegar tæpur stundafjórðungur var til leiksloka.
„Þegar hópur er saman í 300 daga á ári munu menn vera með misjafnar skoðanir. Lookman hefur orðið frábær leikmaður þegar hann bætti sýn sína á liðið. Hann var meira eins og einstaklingur áður. Hann gerði Atalanta frábært og Atalanta gerði hann frábærann. Ég er sannfærður um að hann verði fyrirliði áður en tímabilinu lýkur."
Athugasemdir
