Skagamaðurinn Hákon Arnar Haraldsson er heitur þessa dagana en hann skoraði og lagði upp í 4-1 sigri FCK á Horsens í Íslendingaslag í dönsku úrvalsdeildinni í dag.
Hákon skoraði í sigri á Odense í síðustu umferð og hafði þá lagt upp mark í bikarsigri á Vejle í byrjun mánaðarins.
Hann hélt áfram góðu gengi sínu í dag. Hákon var að sjálfsögðu í byrjunarliði FCK.
Meistararnir voru einu marki undir í hálfleik en í þeim síðari opnuðust flóðgáttirnar.
FCK jafnaði áður en Hákon tók leikinn í sínar hendur. Hann kom FCK í forystu á 52. mínútu og tveimur mínútum síðar lagði hann upp þriðja mark liðsins fyrir Jordan Larsson.
Hákon fór af velli á 73. mínútu leiksins. Ísak Bergmann Jóhannesson sat allan tímann á varamannabekknum, en FCK er í 2. sæti deildarinnar með 39 stig.
Aron Sigurðarson kom inná á 67. mínútu í lið Horsens en lið hans er í 10. sæti með 22 stig.
Athugasemdir