Hollenski bakvörðurinn Marvin Zeegelaar skrifaði í gær undir samning við ítalska félagið Udinese en hann gildir út þessa leiktíð.
Zeegelaar, sem er 32 ára gamall, getur spilað bæði sem bakvörður og á miðsvæðinu.
Hann er uppalinn hjá Ajax en hefur einnig spilað fyrir Sporting, Watford og Blackpool.
Árið 2019 var hann lánaður frá Watford í Udinese, eitthvað sem hefur tíðkast á síðustu árum, enda bæði félög í eigu Pozzi-fjölskyldunnar.
Zeegelaar gerði skiptin til Udinese varanleg árið 2020 en samningur hans við félagið rann út eftir síðustu leiktíð. Hann hefur verið án félags síðan en er nú óvænt mættur aftur á samning út þetta tímabil.
Hollendingurinn var á bekknum hjá Udinese í 1-0 sigri þess á Empoli í gær.
Athugasemdir