Þremur síðustu leikjum dagsins er lokið í 2. deild karla, þar sem topplið Selfoss vann góðan sigur á útivelli gegn Kormáki/Hvöt.
Staðan var markalaus í leikhlé en Gonzalo Zamorano skoraði tvennu í síðari hálfleik til að tryggja sigur Selfyssinga, sem eru með fjögurra stiga forystu á toppi deildarinnar.
Kormákur/Hvöt er í neðri hlutanum með 12 stig eftir 12 umferðir, fjórum stigum frá fallsæti. KFG er einnig með 12 stig eftir jafntefli við KF í dag, en KF er á botninum með 8 stig.
Agnar Óli Grétarsson kom KF yfir snemma leiks en Jón Arnar Barðdal jafnaði fyrir KFG snemma í síðari hálfleik og urðu lokatölur 1-1.
Að lokum mistókst Víkingi frá Ólafsvík að verja 2. sæti deildarinnar þegar liðið kíkti í heimsókn til Húsavíkur.
Elmar Örn Guðmundsson tók forystuna fyrir Völsung á 29. mínútu og reyndist það eina mark leiksins. Þetta er fyrsta tap Víkings á deildartímabilinu og núna eru Ólsarar ekki lengur eina ósigraða liðið í deildinni.
Þetta er dýrmætur sigur fyrir Völsung sem gefur liðinu von um að geta barist um annað sæti deildarinnar, en Ólafsvík situr í þriðja sæti eftir þetta tap - með 23 stig úr 12 umferðum, fjórum stigum fyrir ofan Völsung.
Athugasemdir
