Gillz ætlar að hlaupa nakinn í Kringlunni

Árið 2007 lofaði Gillz á bloggsíðu sinni að hlaupa nakinn í Kringlunni og syngja lagið Every Breath You Take ef dómarinn Garðar Örn Hinriksson myndi dæma vítaspyrnu handa Breiðabliki í efstu deild en nokkrum vikum síðar dæmdi Garðar víti í leik hjá Blikum.

Rio Ferdinand sagðist í gær ætla að hlaupa nakinn um ef Cristiano Ronaldo myndi ekki hljóta Gullknöttinn og í tilefni þess rifjaði Garðar upp loforðið á Facebook-vegg sínum eins og kom fram á Fótbolti.net í gær.

,,Þetta er frábær hugmynd hjá honum. Það er fínt að hann hafi minnt mig á þetta. Ég er spikfeitur núna, einhver 10% fita, sem gengur ekki. Ég get slegið tvær flugur í einu höggi með því að taka gott cardio í Kringlunni og standa við þetta loforð fyrir King Garðar Örn Hinriks,\" sagði Egill við Fótbolta.net í dag en hann ætlar að standa við stóru orðin.

,,Ég á bara að hlaupa í gegnum Kringluna og ég segi ekki að ég muni gera þetta um hábjartan dag.\"

,,Ég veit ekki með conceptið að hlaupa þarna á laugardegi klukkan tvö og vera snúinn niður af fimm öryggisvörðum á limnum, það er eitthvað sem ég væri til í að hafa í lágmarki.\"

,,Ég er meira að spá í að hlaupa í gegnum Kringluna klukkan 3 eða 4 á mánudagskvöldi, þegar það eru ekkert rosalega margir á svæðinu. Ég get ekki lofað tímasetningu en þetta verður gert. Þegar ég geri þetta þá fær Garðar sms með mynd af mér skokkandi um.\"

Egill var á sínum tíma ekki ánægður með dómgæslu Garðars í leikjum hjá Breiðabliki en það sama er ekki uppi á teningnum í dag.

,,Ég vil meina að Garðar sé einn besti dómarinn á landinu í dag. Ég var einu sinni eitthvað svekktur þegar hann spjaldaði 3-4 Blika í röð á KR-vellinum og þá hélt ég að hann hataði Breiðablik. Mér sýnist síðustu ár að honum þyki nokkuð vænt um okkur Blika þannig að ég og Garðar erum bestu vinir í dag. Ég kann mjög vel við hann,\" sagði Egill að lokum.