Arnór Gauti Ragnarsson hefur skrifað undir samning við lið Hönefoss í Noregi en þetta staðfesti félagið í dag.
Arnór Gauti lék með Aftureldingu í Lengjudeildinni á síðasta ári og skoraði þá 10 mörk í 15 leikjum. Hann var þar í láni frá Fylki.
Framherjinn hefur einnig leikið með Fylki, ÍBV, Selfoss og Breiðablik í meistaraflokki. Hann er fæddur árið 1997.
Hönefoss leikur í fjórðu efstu deild Noregs og er Marko Valdimar Jankovic aðstoðarþjálfari liðsins. Hann er fyrrum leikmaður Grindavíkur.
Arnór Gauti fór til Noregs að skoða aðstæður fyrr í janúar og ákvað í kjölfarið að skrifa undir hjá félaginu.
„Þetta er kraftmikill framherji sem getur hlaupið mikið og skorað mörk. Hann er stór og sterkur og er með leiðtogahæfileika," sagði Marko í samtali við heimasíðu Hönefoss.
„Það verður mjög spennandi að sjá hann á AKA Arena þegar tímabilið byrjar."
Athugasemdir